जालना । प्रतिनिधी - महाराष्ट्र प्रदूषण नियंत्रण मंडळाच्या जालना येथील प्रभारी उप प्रादेशिक अधिकारी डॉ. योगिनी अविनाश बाळंके यांनी जुलै 2020 मध्ये चंदनझिरा पोलिसात दाखल केलेल्या गुन्हयातील पत्रकारांची अतिरिक्त सत्र न्यायाधिश किशोर जैस्वाल यांनी नुकतीच निर्दोष मुक्तता केली. निकालपत्रात श्रीमती योगिनी बाळंके यांच्या कार्यपध्दतीसह एकंदरीतच तक्रार आणि गुन्हा दाखल होण्यास झालेला विलंब याविषयी शंका उपस्थित करण्यात आल्याने तक्रारी विषयीच संभ्रमावस्था आहे अशी माहिती अ‍ॅड. लक्ष्मण उढाण, अ‍ॅड. महेश धन्नावत आणि अ‍ॅड. योगेश खरात यांनी दिली.
या गाजलेल्या प्रकरणाची सविस्तर माहिती अशी की, प्रदूषण नियंत्रण मंडळाच्या जालना येथील प्राभारी उप प्रादेशिक अधिकारी श्रीमती योगिनी बाळंके यांनी ता.31 जुलै 2020 रोजी चंदनझिरा पोलीस ठाण्यात जालन्यातील तीन पत्रकार अनुक्रमे अर्पण गोयल, भरत मानकर, विष्णू कदम आणि निळकंठ कुलकर्णी अशा चौघांविरूध्द गुन्हा दाखल केला. त्यांच्या तक्रारीनुसार सरकारी कामात अडथळा निर्माण करणे, सार्वजनिक शांततेचा भंग करणे, बदनामी करणे शिवाय हे सर्व काही संगनमताने केले असल्याचे तक्रारीत नमूद करण्यात आले होते.‘चंदनझिरा पोलिसांनी गुन्हा दाखल करून श्री. गोयल आणि श्री. मानकर यांना अटक केली, तर श्री. कदम यांचा अटकपुर्व जामीन मंजूर झाला. दरम्यानच्या काळात तपास पुर्ण होऊन न्यायालयात दोषारोपपत्र दाखल करण्यात आले. सुनावणी दरम्यान तक्रारदार श्रीमती योगिनी बाळंके याच्यासह साक्षीदार अनिल एखंडे, कल्याणी झाडपिडे, आणि रावसाहेब सिरसाठ यांच्या साक्षी नोंदविण्यात आल्या. त्या बरोबरच साक्षीदारांचे जवाब, प्रसिध्द झालेल्या बातम्या आणि मजकुरासह दोषारोपपत्र दाखल झाल्याने सर्वच आरोपिंनी आरोप फेटाळल्याने सविस्तर सुनावणी घेण्यात आली.
जालना प्रदुषण नियंत्रण मंडळाच्या प्र. उपप्रादेशिक अधिकारी श्रीमती योगिनी बाळंके यांनी मा. न्यायालयात कुठलेही ठोस पुरावे सादर करू न शकल्यामुळे मा. न्यायालयाने या प्रकरणातील पत्रकारांची निर्दोष मुक्तता केली आहे.
About The Publisher
