जालना | प्रतिनिधी - राज्याचे मुख्यमंत्री देवेंद्र फडणवीस यांच्या वाढदिवसानिमित्त पंढरपूर ते शेगाव जाणाऱ्या भाविक दिंडीसाठी दोन दिवसीय आरोग्य व सेवा शिबिराचे आयोजन करण्यात आले. हे शिबिर मुख्यमंत्री सहायता निधी कक्ष, धर्मादाय रुग्णालय मदत कक्ष व जिल्हाधिकारी कार्यालय जालना यांच्या संयुक्त विद्यमाने आयोजित करण्यात आले.
दि. 21 जुलै 2025 रोजी, काळुनका माता मंदिर, जालना येथे पहिल्या दिवशी शिबिर पार पडले. या दिवशी एकूण 127 भाविकांची आरोग्य तपासणी करण्यात आली, तसेच आवश्यकतेनुसार औषधोपचारही देण्यात आले. याशिवाय 209 भाविकांना चरनसेवा (मसाज) देण्यात आली.
दि. 22 जुलै 2025 रोजी, जे. ई. एस. कॉलेज येथे दुसऱ्या दिवशी शिबिर घेण्यात आले. यामध्ये 147 भाविकांची वैद्यकीय तपासणी व उपचार करण्यात आले, तर 153 भाविकांना चरनसेवा देण्यात आली. या शिबिराच्या यशस्वी आयोजनासाठी पुढील संस्थांनी महत्वपूर्ण योगदान दिले —
गुरु मिश्री होमिओपॅथी कॉलेज, शेलगाव, वेदप्रकाश पाटील आयुर्वेद कॉलेज, ओजस फिजिओथेरपी कॉलेज व यशवंतराव चव्हाण नर्सिंग कॉलेज, जालना.
यासह जिल्हा शल्यचिकित्सक डॉ. राजेंद्र पाटील, जिल्हा आरोग्य अधिकारी डॉ. जयश्री भुसारी, मुख्यमंत्री सहायता निधी कक्षाचे वैद्यकीय तज्ञ डॉ. सोपान चव्हाण यांनी अत्यंत मोलाची भूमिका बजावली.
भाविकांच्या सेवेसाठी घेतलेला हा उपक्रम अत्यंत कौतुकास्पद असून, भाविकांनीही या सेवेस भरभरून प्रतिसाद दिला.
About The Publisher
.jpeg)
