जालना | प्रतिनिधी - जिल्ह्यात पुढील काही दिवसांसाठी प्रादेशिक हवामानशास्त्र केंद्र, कुलाबा, मुंबई यांच्या सूचनेनुसार यलो अलर्ट जारी करण्यात आला आहे. हवामान खात्याने दिलेल्या माहितीनुसार, 19, 20, आणि 23 सप्टेंबर 2025 रोजी तुरळक ठिकाणी विजेच्या कडकडाटासह वादळी वारे आणि हलका ते मध्यम स्वरूपाचा पाऊस येण्याची शक्यता आहे. या काळात वाऱ्याचा वेग 30 ते 40 किमी प्रतितास पर्यंत राहू शकतो.
त्याचप्रमाणे, 21 ते 22 सप्टेंबर 2025 या कालावधीत देखील हलक्या ते मध्यम स्वरूपाचा पाऊस पडण्याची शक्यता वर्तवण्यात आली आहे. या हवामान बदलाच्या पार्श्वभूमीवर, जालना जिल्हा प्रशासनाने सर्व नागरिकांना आवश्यक ती खबरदारी घेण्याचं आवाहन केलं आहे.नागरिकांनी काय खबरदारी घ्यावी?
- सुरक्षित ठिकाणी आश्रय घ्या: मेघगर्जनेच्या वेळी, वीज चमकत असताना किंवा वादळी वारे वाहत असताना झाडांखाली किंवा झाडांजवळ उभे राहू नका. वीजेपासून बचावासाठी सुरक्षित ठिकाणी आश्रय घ्या आणि धोकादायक ठिकाणी सेल्फी काढणं टाळा.
- विजेच्या उपकरणांपासून दूर राहा: वादळादरम्यान किंवा वीज चमकत असताना कोणत्याही विद्युत उपकरणांचा वापर करू नका. तसेच, ट्रॅक्टर, शेतीची अवजारे, मोटरसायकल किंवा सायकल यांसारख्या वस्तूंपासून दूर राहा.
- मोकळ्या जागा टाळा: मोकळे मैदान, टॉवर्स, ध्वजाचे खांब, विजेचे खांब, धातूचे कुंपण, किंवा विजेच्या तारांखाली थांबू नका. कोणत्याही प्रकारच्या लोंबकळणाऱ्या तारांपासून दूर राहा.
- मैदानात अडकल्यास काय करावे? जर तुम्ही मोकळ्या जागेवर असाल आणि वीज चमकू लागली, तर गुडघ्यावर बसून हातांनी कान झाका आणि डोकं दोन्ही गुडघ्यांमध्ये लपवा. जमिनीशी कमीत कमी संपर्क राहील याची काळजी घ्या.
- शेतकऱ्यांनी नियोजन करावे: अवकाळी पाऊस आणि गारपिटीमुळे शेतीमालाचं नुकसान होऊ नये यासाठी शेतकऱ्यांनी वेळीच नियोजन करावं. शेतमाल सुरक्षित ठिकाणी साठवून ठेवावा. जर शेतमाल बाजार समितीमध्ये आणला असेल, तर तो सुरक्षित राहील याची खात्री करा.
- जनावरांची काळजी घ्या: वादळादरम्यान जनावरांनाही सुरक्षित ठिकाणी हलवा.
जिल्हा प्रशासनाने सर्व नागरिकांना स्वतःसोबत जनावरांची काळजी घेण्यासाठी योग्य ती दक्षता घेण्याचं आवाहन केलं आहे.
About The Publisher
