जालना | प्रतिनिधी - जालना तालुक्यात सततच्या मुसळधार पावसामुळे जनजीवन विस्कळीत झाले आहे. अनेक भागांत पाणी साचून नागरिकांच्या घरात पाणी घुसले, तर व्यापार, व्यवसाय व शेती क्षेत्रालाही मोठा फटका बसला आहे. शहरातील बाजारपेठा, दूकाने, घरगुती साहित्य, शेतीमाल व वाहने यांचेही प्रचंड नुकसान झाले आहे. या नुकसानाची आज (दि.१८) रोजी भाजपा महानगर जिल्हाध्यक्ष भास्कर दानवे यांनी पाहणी केली. यावेळी त्यांनी लक्कडकोट परिसर, हनुमानघाट, खांडसरी परिसर, सेंटमेरी शाळेमागील परिसर, इदगाह रोड परिसर या सह शहरातील अनेक भागात पाहणी केली.
या परिस्थितीची गंभीर दखल घेत भाजपा जिल्हाध्यक्ष भास्कर दानवे यांनी मुख्यमंत्री देवेंद्र फडणवीस व महसूलमंत्री चंद्रशेखर बावनकुळे यांना पत्राद्वारे तात्काळ पंचनामे करण्यासाठी संबंधितास आदेश देण्याची मागणी केली व तहसीलदार, जालना व आयुक्त, जालना महानगरपालिका व प्रशासनाला तातडीने नुकसानग्रस्तांचे पंचनामे करण्याचे आदेश दिले.
यावेळी त्यांनी म्हटले की, “शहरातील सर्वसामान्य नागरिक, व्यापारी व शेतकरीवर्ग मोठ्या संकटात सापडले आहेत. त्यांच्या नुकसानीकडे दुर्लक्ष होऊ नये. प्रशासनाने युद्धपातळीवर मदतकार्य राबवून तातडीने आर्थिक सहाय्य द्यावे.” भास्कर दानवे यांनी पुढे सांगितले की, शासनाकडून मदत येईपर्यंत महापालिका व जिल्हा प्रशासनाने स्थानिक स्तरावर तत्काळ उपाययोजना कराव्यात. पूरग्रस्त भागांत रोगराई पसरू नाही म्हणून आरोग्य पथके तैनात करावीत, पिण्याच्या पाण्याची सोय करावी तसेच वीजपुरवठा खंडित झालेल्या भागात तत्काळ व्यवस्था करावी. पाणी घरात शिरल्यामुळे नागरिकांची भीषण अवस्था झाली. लहान मुले, महिला व वृद्ध नागरिकांना मोठ्या त्रासाला सामोरे जावे लागले. काही ठिकाणी भिंती कोसळल्याच्या घटना तर काही ठिकाणी झाडे उपटून पडल्याने वाहतुकीवरही परिणाम झाला आहे.
यावेळी जिवन सले, धनराज काबलिये, सुनील खरे, संजय डोंगरे, वसंत शिंदे, अमोल कारंजेकर, दुर्गेश कुरील, कल्याण भदनेकर, गेंदालाल झुंगे, सोमेश काबलीये, हेमंत भूरेवाल, विकास कदम, शाम उगले, रोहित नलावडे, अमन मित्तल आदींची उपस्थिती होती.
